Eldisfiskar Krabbar & skeldýr Uppsjávarfiskar Botnfiskar

Vinnsluaðferðir

Venja var að þverskera á kviðarhol grásleppu eftir veiði og láta hrognin falla í tunnu um borð í veiðibát. Þegar farið var að hirða hveljuna var það krafa kaupenda að grásleppan væri þverskorin á háls, til að auðvelda opnun á kviðarholi og síðan skorin langsum eftir maga frá lífoddi allt að raufarugga í gegnum gotrauf. Mikilvægt er að fjarlægja hrognapoka óskemmda úr grásleppunni og síðan að fjarlægja blóðsekk úr kviðarholi. Þessi nýja aðferð kallaði á betri vinnuaðstæður en almennt eru um borð í grásleppubátum, og því færðist þessi vinnsla meira og minna í land. Sjómenn ísa þá grásleppuna í fiskiker sem síðan er landað til vinnslu í landi.

Við verkun á siginni grásleppu eru þær hengdar saman tvær og tvær á sporði og hengdar upp á hjall. Eftir nokkrar vikur eru þær orðnar signar og tilbúnar til eldunar. Þær eru burstaðar úr köldu vatni og hveljan klippt eða skorin burt, nema sú, sem föst er við fiskinn. Hún er skafin, síðan er hvor helmingur skorinn í 2-3 stykki, sem látin eru í sjóðandi vatn og soðin í 5-7 mín. Froðan veidd ofan af. Hafið nóg vatn og rúmt í pottinum. Borðuð strax með heitum kartöflum.

Þegar rauðmagi er reyktur er hausinn, kamburinn og kviðhveljan skorin frá, hann er síðan þveginn og settur í sterkan saltpækil áður en hann er hengdur upp í reykkofa. Þegar hann er tilbúinn er hann skorinn þvert í þunnar skífur og borðaður beint eða sem álegg á brauð.

 

Leiðbeiningar um slægingu grásleppu til útflutnings http://www.matis.is/media/einblodungar/Leidbeiningar_um_slaegingu_grasleppu_til_utflutnings_LoRes.pdf